利雲特保前4強爆桑坦德

猪拉多纳

04/02/2012
文： 鄭少偉

新正頭唔少公司老闆都會擺春茗同啲伙記勁食一餐，我哋日之泉JC晨曦足球隊前兩日就聯同明星足球隊食春茗，場面鬼咁熱鬧，最開心梗係抽現金獎環節，全場大叫加碼聲勢強勁，老闆都好豪氣安哥不絕，我哋大半隊都幾有運抽到唔少金牛，個個都盡興而歸！我哋咁好運，今日晏晝就當然希望食住個勢，喺旺角場擊敗南華重振聲威，各位波友記住多多捧場！




講完題外話梗要講番波，今晚西甲排第4嘅利雲特將會主場迎戰尾4嘅桑坦德！季初係威係勢嘅利雲特，近5場聯賽得2和3負認真濕滯，依家都係要靠季初啲老本先仲可以捱住個第4。


桑坦德兩主力停賽


老實講，利雲特班波質素唔算突出，季初成績好，都係靠一班球員唔錫力，加埋前面幾隻快馬干尼、巴卡路等去湧去撞搏番嚟。正所謂爛船都有三斤釘，話晒利雲特主場都做低過皇馬，對住下游嘅桑坦德點都秤高啲，話晒客軍雖然幫上場被逐嘅射手梅里迪斯打甩紅牌，但中場杜明高及門將東奴都仲係要停賽，今仗唔容易有分落袋，正路梗係要1.95倍主W。（開賽時間：周日凌晨1:00）