曼城重錘打爆富咸

猪拉多纳

04/02/2012
文： 走肖

歐聯、足總盃同聯賽盃連環冧檔後，曼城喺英超又畀曼聯追到同分，據講曼城贏唔到英超嘅話，領隊文仙尼就會被叮走，而且寸王莫連奴有可能帶埋C朗加盟曼城。依家文仙尼被逼埋繩角，隨時重拳反擊，今晚曼城主場對富咸捧1.75倍「讓球主勝」。（有線200、300及廣東體育周日凌晨1:30直播）




莫連奴想離開皇馬可以話係公開秘密，但最爆炸性嘅係原來C朗都唔多妥皇馬高層，假如寸王執教曼城，佢隨時願意跟埋去幫手。雖然以上消息未必100%準確，但曼城領隊文仙尼聽到，肯定唔多過癮，照計會諗辦法砌低富咸，避免自己被KO冇得撈。


新兵大衞比沙路啱使


雖然曼城仲有巴洛迪利停賽，耶耶托尼同高路托尼踢緊非國盃，不過佢哋勝在錢多，臨近轉會市場關閉又借到羅馬中場大衞比沙路，佢同文仙尼喺國米合作過，應該好容易融入曼城戰術體系。仲有呀，阿古路已經連續5場冇波入，相信佢都好想掃走啲衰氣，隨時發威搵富咸開刀。


富咸薛維爾抖6周


富咸方面，領隊祖爾終於將唔想用嘅森莫亞趕咗去昆士柏流浪，再向史特加借嚟普格恩耶克，前線兵源唔使太擔心，弊在薛維爾上場比賽受傷要休息6個星期，冇咗佢喺中場孭飛幫手掃波，相信隊長梅菲會踢得好辛苦，何況富咸連續8場作客不勝，唔似阻到曼城發達喎！


橫數千軍


曼城近戰旺開單




‧最近5次對賽有4次開入球大。

‧近8場有7次開入球單。

富咸作客8戰不勝

‧對上6場開5次入球大。

‧近8場作客得4和4負。