巴塞官網列5大奪標理據

猪拉多纳

01/02/2012


巴塞隆拿唔爭氣，喺西甲被榜首皇馬拋離7分，不過「地上最強」又點會輕易認輸？班球員除咗齊齊立誓要反先「銀河艦隊」，巴塞仲前所未有地喺官網上列出5大奪標理據壯聲威！




西班牙《每日體育報》指出，巴塞喺對維拉利爾場聯賽和波係對「地上最強」當頭棒喝，失分反而激起班球員嘅鬥心，齊齊喺更衣室誓言要逆轉7分差距後上奪冠：「面對任何挑戰同困難，我哋都會奮戰到底，由依家起，我哋嘅目標係不停咁縮窄同皇馬嘅差距！」




巴塞官網亦高調列出5大可以反超前奪冠嘅理據，包括：1.皇馬尚未作客魯營；2.巴塞主場成績極佳；3.作客成績有改善空間；4.眾多傷兵將陸續回歸：5.過去亦曾數次喺最後關頭扭轉局勢奪冠。其實除咗以上5點外，哥迪奧拿喺球員時代就連續3季喺劣勢下成功衞冕，巴塞喺佢麾下要再創奇迹絕非不可能。