馬體會踩行油撞奧沙

猪拉多纳

30/01/2012
文： 法比加輝

香港時間周二凌晨西甲獨腳戲，奧沙辛拿主場對馬德里體育會，馬體會自從由施蒙尼執教後，成隊波脫胎換骨，最近兩仗分別大勝維拉利爾及皇家蘇斯達，可謂盡顯霸氣，今仗作客態沉嘅奧沙辛拿有力延續氣勢，馬體會讓平半，加輝捧上盤！




（周二凌晨4時開賽）




馬體會上半季表現令人失望，董事局終於忍無可忍，辭退文沙奴，由前阿根廷國腳、執教過學生隊、河床及卡坦尼亞等球隊嘅施蒙尼接手，施蒙尼上任後可以話得心應手，領軍三仗取得兩勝一和佳績，而且近兩仗都贏得相當清脆，睇個勢馬體會仲有排贏，值得再跟進！


奧沙歇冬後未贏過


加輝認為施蒙尼最成功嘅地方，就係先穩固防線，須知馬體會一向不乏攻擊好手，好似哥倫比亞射手法卡奧咁，今季已入咗十四球，但防線演出卻令人詬病，依家施蒙尼上任後大力改革，令球隊三場波一球都冇失，仲射入咗七球，今仗作客奧沙辛拿相信可繼續搶分。




奧沙辛拿歇冬後五戰未贏過，可用攻不銳守不穩嚟形容，表現令人失望，班波咁冇態，對住新官上任三把火嘅馬體會，睇怕都冇運行。