冇傳統勁旅可觀性更高

猪拉多纳

21/01/2012
文： 冼家裕

回想4年前，即2008年，係我首次評述非洲國家盃。當年同我一齊主持首場賽事嘅拍檔係丹尼爾同恩師黎新祥，之後幾場就同何靜江合作。其實從來冇想過以往只能喺收音機聽到嘅一把親切聲音，竟然喺身邊出現，有幸同呢位前輩合作評述，令我獲益良多。當年第一次當球賽評述員，表現相當緊張，未能完全掌握入位嘅適當時候，如何將畫面同評述恰當地連貫一起。幸好有丹尼爾專業嘅評述，黎Sir對足球技巧嘅分析，令我緊張嘅心情慢慢放鬆，能夠完全投入對賽事嘅討論。


赤道畿內亞實力不容忽視


4年後嘅新一屆非國盃，會由今日深夜起至2月12日舉行，呢23日內將會進行32場賽事。兩個主辦國加蓬及赤道畿內亞對大家嚟講絕對陌生，咁啱今屆進入決賽周嘅球隊都以一啲冷門球隊居多，幾支強隊如埃及、喀麥隆及尼日利亞都無緣決賽周。雖然傳統強隊欠奉，但若從另一個角度睇，球迷可以欣賞更多唔同嘅非洲兵，可觀性絕對唔弱。非洲球員同其他國家球員嘅分別係佢哋喺體能同速度上相對優勝，這正正係大家喺欣賞球賽嗰陣可以留意嘅地方。




今屆決賽周揭幕戰正係由東道主赤道畿內亞對利比亞，雖然前者至今未參加過任何國際大賽嘅決賽周，世界排名亦較利比亞低出一半有多，但從早前熱身賽能夠先後逼和喀麥隆同南非觀之，實力絕對不容忽視。