赤道畿內亞搏命賺紅「利」

猪拉多纳

21/01/2012
文： 力奇

2012非國盃今晚展開，揭幕戰由東道主之一嘅赤道畿內亞喺主場迎戰A組對手利比亞，平手盤下，力奇睇好可開1.93倍「主勝」。事關東道主換帥後上下一心士氣大振，加上該國足總開出100萬美元（約780萬港元）贏波獎金，有錢使得鬼推磨，自然勝券在握啦！（now676台周日凌晨2:30直播）




赤道畿內亞同加蓬攜手主辦今屆賽事，其中前者更憑東道主身份，歷來首度躋身呢項非洲國家盛事。佢哋喺賽前兩星期爆出易帥風波，唔少人都以為實冇好嘢，但查實佢哋之前由軒利米切爾領軍嗰陣仲弊，因為呢位法籍主帥堅持徵召西班牙出生嘅歸化球員，引嚟隊中唔少土炮不滿。


易帥後更團結一致


直到早前該國足總終於狠下殺手，改搵巴西籍領隊基爾臣保羅接手，雖然話呢位前華斯高青年軍主帥都照樣徵召幾名「外援」入伍，但對佢哋態度明顯同以往有別，顯得更為公平，難怪中場艾祖高奧禾路都話陣內士氣一流唔同晒。搞得掂士氣，足總同時間更宣布今仗對利比亞一旦贏波，球員就可以瓜分100萬美元獎金，另外每入一球就分多2萬美元，試問仲點會唔搏命？


利比亞備戰工夫差


利比亞呢邊，咪以為世界排名63，高出主隊一大截就可以穩勝，事關佢哋之前受到國內政局動盪影響，球員備戰工夫自然做唔足，睇番近6戰只得4和2負就知。再者，佢哋搵個星級球員都冇，唔似得主隊仲有保迪普同巴保亞等前西甲球星孭飛，擺明實力有限，今鋪作客出戰認真危危乎。