4大投X錦囊話你知

猪拉多纳

20/01/2012

兩年1度嘅非國盃今屆已經嚟到第28屆，翻查數據，有4大投X錦囊值得留意，大家出擊前睇睇，應該幫到手o架！仲有，今屆非國盃精選場次會由now676台直播，喜歡玩即場嘅朋友，記得留意喇！

 1.揭幕「大」戰多

過往唔少國際大賽，揭幕戰往往都係悶波一場，不過嚟到非洲戰區，參戰球隊似乎都想爭響頭炮，以攻為守，於是近4屆揭幕戰都開出入球大，上屆安哥拉主場對馬里更打成4:4平手添，連總入球7+都開得出呀！

 2.決賽有氣「細」

爭冠軍梗係穩陣行先，就連非洲波都唔例外。睇番對上13屆決賽，竟然係開出3大10細，其中近3季決賽開出3連「細」，3場波夾埋入得2球，有場仲要悶和0:0靠互射12碼分勝負。

 3.科特迪瓦喪攻

自從杜奧巴彈起，科特迪瓦已經成為非洲足球最強大勢力，家陣佢哋中前場仲有沙洛文卡勞、謝雲奴同耶耶托尼，火力強勁。呢隻「非洲大象」一向踢法注重進攻，佢哋近2屆賽事踢9場波，就累積開出7大2細！

 4.加納「1」氣呵成

曾經4奪非國盃冠軍嘅加納，佢哋最強嘅武器就係穩中求勝，往往同對手都係1球上落。佢哋上屆決賽0:1僅負埃及，由分組賽開始踢6場就有4場開總入球「1」球，唔到你唔信o架。