東道主赤道畿內亞勢響頭炮

猪拉多纳

20/01/2012

第28屆非洲國家盃聽晚激爆展開，揭幕戰由東道主之一赤道畿內亞喺A組對利比亞。睇番陣容，首次出席決賽周嘅赤道畿內亞有唔少球員喺西班牙搵食，夠料開W響頭炮。


今屆非國盃由赤道畿內亞同加蓬聯合主辦，雖然往績上睇，赤道畿內亞係非洲魚腩，但正所謂今時唔同往日，近年赤道畿內亞識得徵召西班牙移民入伍，牌面上強番好多，今次大軍中大部分都係來自西班牙球隊。講到赤道畿內亞最大牌球星，當然係効力拉科嘅隊長保迪普，前線有拉斯彭馬斯前鋒蘭迪同比拉馬翼鋒巴保亞選擇，配合主場球迷嘅瘋狂打氣，真係有條件嚇你一驚，更何況過去9屆非國盃揭幕戰主辦國球隊有4勝3和2負，唔撐點得？

利比亞未遇真正考驗

至於利比亞，最出名當然係過去嘅狂人領袖卡達菲，足球？對唔住，真係唔知佢哋有咩代表作，布拉加中場馬哈馬特賓迪係少數能夠去歐洲落班嘅球星，其餘能夠外流嘅球員主要去中東落班，而且利比亞嘅外圍賽對手只不過係贊比亞、莫桑比克同科摩羅，最終以次名出線證明好打有限啦。