舒韋恩史迪加復出拜仁搶錢格

猪拉多纳

20/01/2012
文： 走肖

德甲放完冬假即刻有好戲上演，慕遜加柏今晚喺主場對拜仁慕尼黑，搶分機會唔大，首先慕遜加柏王牌馬高列奧斯落實踢埋今季投奔多蒙特，士氣難免受損，其次拜仁有大將舒韋恩史迪加復出，主席路明尼加又話要袋更多電視轉播費，搶錢格要捧1.46倍客W。（有線61及201、中央5台周六凌晨3:30直播）

慕遜列奧斯走人損士氣

慕遜加柏新星馬高列奧斯上半季大爆發，成為轉會市場搶手貨，最後佢選擇今季結束後轉會多蒙特，對於慕遜加柏嘅未來發展，可以話係致命打擊，甚至會拖低士氣，加上中堅丹迪今場要停賽，就算佢哋曾經喺今季聯賽開咧戰作客以1:0砌低拜仁，睇怕都係追唔過。


另一方面，拜仁中場舒韋恩史迪加近期已經喺熱身賽復出，而且入過世界波，證明狀態唔曳，配合今季聯賽有16個入球嘅射手馬里奧高美斯，同埋喺邊線逢人過人嘅翼鋒洛賓，真係好難頂得住，中場列貝利停賽相信問題唔大，榜首優勢得3分當然要繼續搏。


仲有呀，最近德甲密謀以更高價錢賣出電視轉播權，拜仁主席路明尼加乘機發難，佢話現時德甲球會基本上平分轉播費嘅制度過時，覺得拜仁係聯賽風頭躉，至少要比其他球會袋多1倍轉播費，咁大口氣，如果呢場W唔出咁肉酸，睇怕都唔好意思開聲要錢啦，係咪？