9星連珠巴甲史上最激鬥

港陌

21/05/2011


九星連珠，必有異象！巴甲聯賽被喻為球壇上最難打嘅一個聯賽，自踏入千禧年後11年間就產生咗8支冠軍球隊。新一屆巴甲聽朝開鑼，隨住包括李華度、朗拿甸奴同路爾斯法比安奴等球星回流，與尼馬、甘素等新星聚首，九大球星同台較量，史上最激烈難測嘅巴甲球季，你點可以錯過？




世界盃、奧運會喺2014年同2016年排住隊殺入巴西，即時引來無限商機，國內外企業為求推廣業務，大都選擇贊助巴甲球隊。球會得到大財團支持，再加上賽會啱啱同國內電視台Rede TV！達成協議，未來3季電視轉播費將高達15.5億雷亞爾（約74億港元），等住列強爭取好成績瓜分，各路雄師自然大開水喉，吸納一眾鳥倦知還嘅超級球星回流。


細哨回歸即捧盃


要數回流兵團最大焦點，自然係曾經喺巴塞隆拿叱咤風雲嘅「細哨」朗拿甸奴。今年初佢宣布離開AC，即時吸引包括甘美奧、彭美拉斯同哥連泰斯等多間大球會垂青，最終佢選擇落戶法林明高。31歲嘅佢依然寶刀未老，季前就先幫呢支老牌球會喺州聯賽錦標取得佳績，今屆喺巴甲嘅演出自然備受期待。




細哨之外，前世界足球先生李華度本來喺小球會莫奇米林做會長，但始終寂寞難耐，最後選擇用外借身份加盟聖保羅，爭取煥發最後光芒。同佢喺聖保羅拍檔搵食，仲有前西維爾射手路爾斯法比安奴，呢個前鋒舊年仲有份幫巴西踢世界盃，級數超班。另外前里昂中場「P祖」祖連奴比南布肯奴突然加盟華斯高，佢嘅百步穿楊罰球妙技未見生疏，肯定係球隊搶分必殺技。


尼馬甘素豪門獵物


早一年回歸巴甲嘅迪高，上季即協助富明尼斯重奪冠軍，「卡士」盡現。國際體育會嘅「大頭」迪阿歷辛度，則係少數能夠喺巴甲企穩陣腳嘅阿根廷球星，舊年仲獲選為南美足球先生添，佢嘅鋪橋搭路功夫絕對唔講得笑。




老將巨星風采依然，但眾所周知森巴球壇一向盛產天才，山度士兩名超級新星「新比利」尼馬同甘素，前者多次獲車路士力邀過檔，甘素則被指係AC米蘭囊中物，二人喺出國之前，當然會省靚招牌以證身價。唯一可惜，係今季回流哥連泰斯準備頂替掛靴名將朗拿度嘅阿祖安奴，早前佢突然因傷宣布休戰5個月，不過一旦「國王」傷愈回歸，黃金左腳一出，邊個敢保證佢唔會東山再起，引領哥隊稱霸巴甲？

賽制

共20隊角逐，採雙循環制，同分將順序以下列方法定名次：

1.勝出較多場數

2.較佳得失球差

3.較多得球

4.同分球隊之對賽成績

5.較少紅黃牌數目

6.抽籤

上季巴甲射手榜

球員 球隊 入球

1 莊拿斯干卡維斯 甘美奧 23

2 尼馬 山度士 17

3 般奴施薩辛拿基 哥連泰斯 14

4 伊利亞斯列比路 戈亞尼恩斯 12

4 奧賓拿 明尼路 12

6 安達利馬 甘美奧 11

6 艾比奧 保地花高 11

8 華盛頓 富明尼斯 10

8 韋斯利巴保沙 普丹迪 10

8 薛伊度亞度 山度士 10

8 阿歷辛度 國際體育會 10

8 迪亞高泰達利 明尼路 10

8 基拔 彭美拉斯 10