岡田武史高帽笠中村

港陌

29/06/2010

日本領隊岡田武史對於球隊仍然有信心，佢預測球隊會比南韓走得更遠。最大原因唔係陣中有大勇嘅本田圭佑，而係球隊有兩個領隊。所指嘅領隊，其實係一直擺喺後備席嘅中村俊輔。隨年紀增長，中村俊輔喺日本國家隊已經失去正選位置，但佢嘅經驗絕對可以幫到球隊，岡田武史深信呢個「副練」，可以帶領球隊擊敗巴拉圭繼而殺入八強。


據岡田武史所講，中村俊輔嘅判斷比佢更直接準確。而隨着日積月累嘅經驗，中村俊輔閱讀球賽能力亦明顯增強。岡田武史仲講笑咁話，感到自己領隊地位正受到威脅。岡田武史賽前大讚中村俊輔：「雖然中村一直留守後備席，但無論操練或比賽，佢都發揮極大作用。除可團結球員之外，仲經常為年輕球員提供意見。」

球員休息恢復體力

另外，日本並未有為今場比賽加強操練，只係安排球員跑圈熱身，部分主力球員就留喺酒店休息。岡田武史表示，瘋狂操練對球員未必有好處，適當嘅放鬆有助球員恢復體力及調整心理。