Ｃ朗分身鬥牛

港陌

29/06/2010

C 朗孭住全球最高身價球員重擔、背負全葡萄牙國民期望，誓與西班牙全民為敵，今晚一個人分身打三場仗！C 朗雖於分組賽三奪「最佳球員」獎項，但實際表現仍受到批評，身為球壇至尊，面對無窮壓力也要挺過去。今晚十六強，C 朗將帶領葡軍挑戰「地上最強」西班牙，除力爭晉級外，還要為自身名譽、地位而戰。面對一班巴塞宿敵，誓吐聯賽屈居老二悶氣，而與費蘭度托利斯為首的一班「鬥牛國」偶像巨星交鋒，也要證明自己才是真正「萬人迷」；最後，亦最重要，就是於這場「伊比利亞半島內戰」，書寫葡萄牙國家歷史新一頁！ （有線61台周三凌晨2時30分直播）


C 朗近年鋒芒畢露，一張俊臉亦引死人，難怪商業價值飆升，被睇好將來成為另一個碧咸。但經過幾年發展，C 朗受歡迎程度不但同碧咸仍差幾條街，突然仲殺出個費蘭度托利斯，相信C 朗亦始料不及，條氣肯定唔順。

同費托王子正邪不兩立

托利斯場上可能冇C 朗咁勁，但講靚仔卻有過之而無不及，最攞命係托利斯靚得嚟夠正氣，私生活檢點仲已成家立室；相反C 朗眉宇間邪氣逼人，場上小動作多多出名陰濕，報復行為屢見不鮮，又鍾意「插水」博十二碼，幾好波都畀人鬧。而私底下佢又係個花花公子，爛蒲爛滾唔衰唔做，有女埋身就來者不拒，形象當然直線插水。


西班牙人輪廓分明，「鬥牛軍」好多都靚仔，除托利斯外，卡斯拿斯、沙治奧拉莫斯、捷西斯拿華斯、大衞施華及法比加斯都「秀色可餐」，今場C 朗一定要大踢身價波，堂堂正正擊敗對手，先可搶番球壇第一地位。

以牙還牙誓報復巴塞牛

西班牙擁有八名巴塞隆拿球員，正選中就有半隊來自巴塞，今季巴塞食住皇家馬德里，作為皇馬頭號王牌嘅C 朗，梗係想報一箭之仇！


好多人都話，西班牙依家嘅戰術係抄巴塞，後防支柱係碧基同佩奧爾，布斯基斯負責中場掃蕩，進攻發辦則交畀沙維及恩尼斯達，入波重任則交畀剛加盟巴塞嘅韋拿，甚至連星級後備法比加斯，都係半個巴塞人。

要為皇馬出番口氣

C朗今季以天價加盟皇馬，但皇馬卻吓吓畀巴塞食住，即使皇馬已打破西甲史上最高積分，依然屈居喺巴塞之下僅得聯賽亞軍，以皇馬名氣及C朗全球最高身價球員身份，當然係唔忿氣啦！今晚遇上巴塞為骨幹嘅西班牙，正好係C朗將屈辱一次過雙倍奉還嘅好機會。

此外，韋拿喺今屆世界盃已經射入三球，而C朗則啱啱結束長達十六個月嘅國際賽入球荒，對北韓射入一球，不過C朗成日畀人批評踢國際賽唔掂，睇嚟今次真係要好好表現自己。

顛覆伊比利亞半島王朝

今場係伊比利亞半島打吡，葡萄牙曾經喺一五八○年被西班牙侵略，直至一XXX○年先擺脫西班牙統治，兩國文化上有好多共通點，但近年經濟都一塌糊塗，同被嘲笑為歐豬四國之一。

認足幾百年低威

西班牙同葡萄牙係鄰國，兩國難免會互相比較，不過喺足球層面嚟講，西班牙卻佔到壓倒性優勢，兩地歷史上碰頭三十二次，西班牙贏咗十五次，打和十二次，僅輸過五次。而喺大賽成績方面，西班牙係兩屆歐國盃冠軍，而葡萄牙則未攞過任何大賽錦標，最叻都係○四年以東道主身份取得亞軍。

聯賽方面，西甲水準亦遠高於葡超，近年有唔少葡萄牙國腳好似Ｃ朗、比比、沙保沙、堤亞高文迪斯等都去西甲搵食，所以Ｃ朗今次都要向外界證明，葡萄牙足球唔差得過西班牙！