高清睇跑馬：清風駒後勁犀利

魑魅魍魉

　　今季總場次672谷草四班1200米﹕「清風駒」排十二檔形勢被動，白德民亦一心留前鬥後，出閘後捉到實並瞬即切入內叠，沿途跟在尾三位置。由於頭兩段僅跑出廿四秒及廿三秒五，步速偏慢下落後前列馬不算太遠，然而內檔塞車冇位上，入直路時被迫移出外叠望空，結果愈追愈勁之下跑回一席第四，並跑出同場最快的末段時間，確認這匹三歲馬已具備爭勝條件﹔今戰增程跑一哩更合，柏寶為爭冠軍亦必無保留，開齋在望。

　　總場次503谷草二班1650米﹕排五檔的「幸福紅椒」起步反應敏捷，在柏寶胯下跟在四、五位角逐，雖然走來仍有點搶口，幸好前邊有「開心歡樂」作遮擋，走勢大致暢順。轉最後彎位時開始加速，柏寶更將坐騎拉出外叠追趕，望空後衝刺如箭，縱使「精彩生輝」後追甚勁亦未能埋身構成威脅，結果跑出一分三十九秒正贏馬。上仗「幸福紅椒」出戰1200米路短敗勿作準，今仗回師首本谷草一哩，就算排十一檔亦不能睇小。

Sam