洪禮賢講馬：注碼得失定英雄﹖

魑魅魍魉

　　香港馬圈彩池龐大，涉及當中利益的大有人在，當然，筆者所指的利益係光明和公開那類，騎練及馬主係其中角色，馬友們也不會是閒角，尚有集團式經營的投注者，概括係分呢幾類。而通常外界會認為馬主們知得最多，直接嘛，點會唔消息靈通，買親梗係有把握，中親梗會大大煲。但如果真係咁諗，想做馬主嘅人數，點會唔升得快過恆生指數呢﹖

　　曾幾何時，可能做得馬主，在投注時往往如有神助，呢點唔排除，但只會係一小撮人，而舊年代嗰批，輸到「摺埋」唔係冇噃，反而依家可能所佔比重仲會少啲，隨着思想進化，大家也意識到賭錢邊有中梗，玩玩吓可能仲會襟啲，正如馬會都鼓吹人們博彩要有節制啦﹗

陪着偉感成長好feel

　　有時賽馬引人入性之處，未必在金錢上完全反映得到，以自己為例，贏一萬的快樂指數，可能不及輸三兩舊的傷感值。只因我視賽馬為一份職業及一種娛樂，注碼唔會搏命，亦唔會瞓身，但會介意部分自己揀嘅馬得與失。打個比喻，連續兩次在臨場選了「偉感」，滿足感係有（但１個崩都冇買過噃），始終睇住佢在陣上慢慢起了變化，由出道初期走規幾亂籠，及至陣上有頭冇尾，再演變至入Ｐ和開齋，真係有陪住佢大的感覺，而呢一份滿足感，就算啱啱禮拜日有買到，亦唔喺佢53蚊嘅獨贏產生相近feeling﹗所以，對於博彩注碼上的得失，未必一定係勝負定英雄，除非係搏命錢，若不，唔好睇得太重，反而會更能投入賽事，同埋，感受到當中的真正樂趣。