兩大金猴初一蒲頭 車魔獻瑞係威係細

猪拉多纳

英超大戰陪你過猴年！車路士主場鬥曼聯呢場重頭戲喺大年初一凌晨零時開波，雙方兩大「靈猴」泰拔高圖爾斯及連格一同獻瑞，等大家齊齊睇好波迎接猴年，夠晒應節！新一年好開始，今場捧細啱數，皆因車仔對上7次鬥「紅魔鬼」有6場開細，今場梗係繼續追喇！

（now 621周一凌晨零時直播）

車路士對曼聯以往都係爭標大戰，點知兩軍今季流年不利，成績麻麻，車仔踢咗大半季後只係排緊第13位，換上希丁克執教都冇乜起色，佢喺聯賽領軍7場僅得2勝，王牌夏薩特繼續狀態低沉，前鋒迪亞高哥斯達掛住撩是鬥非，茅招盡出，成為敵軍防線針對目標，而新兵柏圖就要操多一排先可上演其處子戰，車仔今場睇怕都係冇乜板斧！

至於曼聯喺「方丈」尹戈爾領軍下大打悶蛋足球，悶到球迷瞓着，近排攻力雖然有改善，但今場話晒作客，對手仲要係近年死敵車仔，預料「方丈」會重施故技放悶彈，就好似上月作客利物浦一戰，全場穩守至上求不敗，去到比賽尾段先靠朗尼一腳收死對手。
聯賽近7度交鋒6次開細

尹戈爾帶領紅魔年幾時間，最大政績可以話係佢肯提拔年輕球員，92年出世屬猴嘅連格就成功搶走貴價新兵迪比嘅正選位，獲「方丈」委以重任，呢隻甩繩馬騮喺上場大勝史篤城3比0一戰先開紀錄，表演搶鏡。車仔陣中都有隻「生猛神猿」，就係同樣92年出生嘅門神泰拔高圖爾斯喇，呢位水準一直好穩定嘅門將，經常有神級演出，有佢鎮守車仔最後一關，曼聯想入波都幾難！再睇埋兩軍對賽往績，連今季首循環0比0一仗在內，兩軍近7次聯賽對戰開出1大6細，當中有3場總入球係1，2場互交白卷，今場捧細盤過個肥年喇！