季尾多人撐 柏寶要「贏」唔難

猪拉多纳

　　柏寶自從三月份開始，成績有所改進，多得方嘉柏重新支持，畀完一隻又一隻好馬佢去搏，「龍華太旨」及「勝利星將」已經係明醒㗎啦，呢啲馬正常應該搵潘頓騎，畀着幾個月前，點會輪得到柏寶。

　　除了方仔之外，賀賢、容天鵬都同佢加強合作，形成季尾階段柏寶多咗子彈，成績自不然有進步，假假哋昔日馬場二哥，唔係冇身手，又唔係冇人脈，邊使淪落到三四線。

　　其實，近期柏寶經常有頭馬進帳，但唔好期望佢可以似得雷神、潘頓咁勁，一日三數場，佢多數係一兩場貨仔，想佢中三元，真係難過登天。所以，就算幾鍾意佢啲馬都好，全日博一兩隻就夠嘞。

　　包裝博士騎慣騎熟

　　今晚柏寶策騎7匹，首先梗係要吼實方廐「包裝博士」，呢匹馬以前係柏寶打理，亦有過成績，輾轉漏咗畀郭能，今次終於畀柏寶騎番，點會唔傾力演出。

　　另外，「跑贏大市」一哩成績好，經常上到名，又係隔咗一排畀番佢騎，唔使驚佢會唔賣力。