大摩專心攞盃

猪拉多纳

　　今日設有兩項盃賽，第八場長途三冠大賽尾關遮打盃，第十場沙田銀瓶，唔使問阿貴，人人都會優先留意大摩啲馬，而佢亦冇欺場，又一次總動員出嚟爭盃，每場出馬各3匹，實行質量兼具。

　　依家大摩仲有冇機會爭練馬師冠軍，真係有啲懷疑，睇個勢，係冇方東兩廐咁勁，人哋兩個密密食，喼住有馬贏，呢排搏極未手軟，反觀阿摩，近期攻勢「立立哋」，之所以，爭冠未必有行嘅時候，不如專注盃賽，贏多啲獎金仲好過。

　　第八場本地一級賽2400米，「威爾頓」、「多名利」及「同個世界」，睇配搭，講實力，「同個世界」肯定秤低好多，都係盡吓人事，旨在參與而已。至於「威爾頓」及「多名利」，前駒冇大長途經驗，只係名氣響，賠率賣到十幾皮，真係誇咗啲；後駒貴為應屆香港瓶盟主，2400米有晒證明，小心暗渡陳倉。

　　第十場本地三級賽1200米，「一寶」今季屢有驚喜，連「天久」上場都唔係佢嗰皮，呢次用到殺手貝湯美，一定再搏；「恩格斯」今季仲未交代，大摩唔想冇面，可能各為其主；「花月佳期」限於實力問題，想造就都未必得，似係陪隊分子。(Jack)