歐國盃：西班牙足總宣布韋拿落選

猪拉多纳

重傷初愈 狀態體能谷唔起

韋拿歐國盃夢碎！「狂牛大軍」已經抵達奧地利進行集訓，雖然歐國盃名單至今尚未將巴塞同畢爾包球員納入其中，不過西班牙足總就提前宣布，傷愈冇耐嘅韋拿因為狀態麻麻無緣入選。
抵奧地利集訓一周

力爭衞冕歐國盃嘅西班牙，喺當地時間周二晚抵達奧地利，進行為期一周嘅集訓，期間除咗會有數節操練對外開放，「狂牛軍團」亦會喺周六同塞爾維亞踢場熱身賽備戰。西班牙力爭成為首支連續贏得3項主要國際賽事嘅國家隊，不過期間就傳來噩耗，重傷初愈嘅射手韋拿因為狀態不足，將無緣今屆歐國盃！

雖然西班牙要到5月27日先公布完整嘅歐國盃大軍名單，但係足總就提前喺官網宣布韋拿落選：「韋拿已經同軍醫、領隊迪保斯基傾過，佢表示自己體能同狀態未如理想。」韋拿喺國家隊保持住上陣82場入51球嘅紀錄，雖然喺去年底世冠盃受嘅傷大致好番，可惜狂操一輪後仍然未能趕上「尾班車」。