歐洲盃：歐國盃＝奇迹、英雄地

猪拉多纳

經濟不景、樓價飛升，最慘係人工冇乜點加，唔少打工仔都希望有奇迹，中番次XX彩就一世無憂。話明係奇迹，當然唔會咁易出現，但喺安高睇波嘅日子當中，就見證過2次歐國盃奇迹，一次係92年丹麥以後補身份奪標，另一次係04年希臘推翻列強稱霸。
丹麥兩巨星魅力爆燈

要創造奇迹梗要靠英雄，92年嘅丹麥奇迹係靠我偶像舒米高同白賴仁勞特立。當年丹麥臨時頂替南斯拉夫出戰，舒米高就由分組賽未收身，頂住大肚腩甩手甩腳，打到入決賽屢救險球成為抗德英雄。至於白賴仁勞特立喺大佬米高拒絕披甲下，發揮天才本色領軍直搗黃龍捧盃，呢對一攻一守巨星，魅力四射、令安高深深迷上足球。

及至04年見證平民球隊希臘封王，過程係點唔重要，反正都係一味穩守求勝，見關過關。就係呢隊波話畀大家聽，原來冇球星都好，只要齊心一樣事成。想當年嘅希臘英雄，最令我印象深刻嘅係「希臘佐治古尼」門神尼高普尼迪斯，另一個則係神奇隊長薩高拉基斯。球場有奇迹，安高都希望人間有奇迹，唔知我幾時可以中XX彩呢？