銀河 地震獻「細」

猪拉多纳

美職衞冕冠軍洛杉磯銀河今季走晒樣，鬼咩！碧咸、當路雲同艾臣布度冇態，羅比堅尼又係咁傷，中前場可以話死晒火。撞啱國際賽期殺到，人腳唔齊嘅銀河聽朝主場恭候冇咗把利刀嘅聖荷西地震，睇怕入波唔會多，1.77倍入球細係明智選擇。（開賽時間：周四早上10:30）
碧咸冇態銀河西岸包艇

銀河家陣喺西岸包艇，近5場聯賽全部失分之餘，上仗更加係5年嚟首次喺打吡戰輸畀芝華士，狀態真係差到嚇死人。銀河沉成咁，好大原因係因為幾位上晒年紀嘅食胡球星包括碧咸、當路雲同艾臣布度冇態，當中羅比堅尼同當路雲亦因為畀國家隊徵召將會缺陣，鋒力弱上加弱點信得過呀？

主隊銀河有一對守將奧馬干沙利斯同大衞盧比斯因傷停問題缺陣，不過咪以為地震咁易搵到食，事關今季已經攻入11球嘅雲度路斯基，剛啱畀奇連士文召咗入美國國家隊訓練營，既然兩隊波前線都信唔過，入球細梗係要捧啦！