崇山寶新馬賽狂勝

猪拉多纳

尋日上演今季首場新馬賽，照舊冷場只係得六隻馬跑，結果全場唯一嘅兩歲澳洲ＰＰＧ「崇山寶」，殺低咗其他五隻三歲北半球自購新馬，仲要大勝亞軍七又四分三馬位，打破季內贏馬最遠距離，認真誇張，睇嚟「崇山寶」嘅前景都係一片光明。
       
崇山寶贏甩對手一條街，姿態誇張。

「崇山寶」嘅馬主就係影壇大哥大洪金寶，尋日愛駒初次上陣，佢就特登帶埋媽媽同埋曾志偉一班老友入場幫手打氣，好彩「崇山寶」無令佢哋失望，大勝之餘仲幫洪大哥第一次拉頭馬。賽後洪金寶就話自己一直都好緊張，事關佢之前都有睇過愛駒試閘，走得好快但拉士就弱咗，估唔到出賽就咁勁，一放到底贏馬。雖然姚本輝尋日去咗澳洲買馬唔喺香港，但洪大哥都話練者係最大功臣，因為幫佢揀咗隻好馬返嚟，「崇山寶」今次一出即勝，希望之後繼續有好表現。