曼聯圍捕「金絲雀」

猪拉多纳

26/02/2012
文： 郭球奇

曼聯領隊費格遜啱啱喺歐霸盃玩「幼齒」試陣，結果差啲「賴嘢」，今晚返番英超作客諾域治，為追貼榜首曼城，試問仲點敢再亂嚟？預計派番一大班老鬼擔正，對住一向恰慣嘅「金絲雀」，可以話穩開2.15倍「讓客」！（有線201及301周日晚9:30直播）


諾域治 Vs 曼聯


因為首回合有兩球喺手，曼聯上周中喺歐霸盃32強次回合主場對阿積士大派年輕球員上陣，結果玩出禍最後輸1:2，兩回合計僅贏3:2驚險出線，賽後領隊費格遜認排錯陣，話唔應該一次過出太多後生仔擔正，自己會負全責，你話今晚仲點敢再玩？


朗尼養病 「小豌豆」大勇


再者，為追趕榜首嘅曼城保住英超爭標機會，曼聯今晚根本冇失分餘地，所以賽前講明今晚一定會派番里奧費迪南同艾拉兩大老將鎮守後防，中場亦有傑斯同卡域克回歸壓場；前鋒朗尼因喉嚨受病毒感染，據報今晚會繼續缺陣，但球奇就唔太擔心，事關「小豌豆」查維亞靴南迪斯近排重拾勇態，連續4次幫曼聯上陣都有「士哥」，拍住新進英格蘭國腳韋碧克，對諾域治綽綽有餘啦！




諾域治今季表現令人驚喜，賽前領隊林拔話中堅韋伯特經已傷愈，今晚可以復出，仲話有信心可以畀曼聯麻煩，不過球奇就唔係咁睇，事關睇番往績，諾域治對賽輸多贏少，唔講太遠，對上6次主場交手只得1勝5負，5場敗仗仲要全部輸2粒或以上，擺明格食格，撞正曼聯啱啱輸波，呢場肯定打醒十二分精神，唔好話贏波，「金絲雀」今晚想破蛋都真係唔係咁易！