英聯盃紅軍決戰卡城

猪拉多纳

26/02/2012
文： 麥馬拿仁

英格蘭聯賽盃決賽，利物浦在中立場倫敦溫布萊球場火併英冠卡迪夫城。紅軍捧盃機會係高，但去屆阿仙奴都贏唔到伯明翰，利物浦必小心翼翼，戰情會好緊湊。近年曼城、車路士、阿仙奴喺本土盃賽決賽鬥弱旅都開「半場和」，今日唔怕再追，2.4倍分頭啱胃口！（now 631及638周一凌晨零時直播）




利物浦係當然奪標大熱，但去到決賽變數極多，紅軍齋Ｗ得1.27倍，奪冠更只得1.11倍，賠率奀到完全唔抵玩。利物浦今屆以強陣應付盃賽，以波論波當然秤先過「卡城」，但球隊表現飄忽，攻力亦唔算頂級，蘇亞雷斯停賽後已冇咁弗，安祖卡路爾亦平平無奇，只有比拿美較可信賴。另外，除謝拉特外，多名主力如查理阿當、佐敦軒達臣、達寧等決賽經驗唔多，今戰壓力又完全喺佢哋身上，或會影響發揮。




事實上，利物浦近年踢盃賽決賽鬥弱旅，周時失準，○一年英聯盃對伯明翰、○六年英足盃鬥韋斯咸，都同對手喺法定時間內打和，今次縱然鬥英冠球隊，紅軍亦難言穩勝。


決賽往績旺「半和」


卡迪夫城一向硬淨，而且決賽經驗豐富，○八年殺入英足盃決賽後，兩年前又打入英冠附加賽決賽，前鋒堅尼米拿、中場韋定咸、後防麥諾頓都有卡士，半場悶和紅軍毫不出奇。




就算決賽對戰雙方強弱懸殊，但球賽喺中立場上演，又一場過定生死，彼此實力都會因而拉近。翻查近三屆英聯盃決賽，曼聯鬥熱刺、阿士東維拉都開半場和，上屆阿仙奴鬥伯明翰，同今戰形勢好相似，就踢成一比一，今場真係唔怕再追「半場和」。