學生隊冇火捧細好過

猪拉多纳

25/02/2012
文： 九叔

「巫師」回歸學生隊有波贏？响阿甲開季3戰不敗嘅學生隊，今日有華朗（圖右）刑滿復出領軍，主場對住尾二嘅獨立隊，表面睇不勝無歸，但係呢兩班波攻擊力都好弱，玩1.52倍入球細點都穩陣過主W。（開賽時間：周日早上6:10）


獨立隊開季兩戰冇波入


因為停賽兼腿肌發炎休戰嘅華朗，今場重披戰袍，令人對開季不敗嘅學生隊好有期望，不過學生隊自己就顯得唔夠信心嘞，包括《奧萊報》在內嘅阿根廷傳媒，都話經過禮拜三嘅閉門操練後，學生隊又考慮變陣喎，除咗後衞施利停賽，由沙魯拉堤頂上係必須嘅變動，華朗復出擔正亦好正常，但係小將沙治奧莫當、李安度賓尼迪斯代替馬里安奴干沙利斯、莫路費南迪斯負責中場兩翼側擊，就明顯係再次執位，據講學生隊啲頭頭仲未揸定主意踢4-4-2定係3-4-1-2陣式。




其實又難怪嘅，學生隊係就係跨季8戰不敗，但係期間只贏過3場，今季聯賽開幕戰贏嗰隊，仲要係至廢嘅包尾大幡班菲特，跟手對住舊生、聖羅倫素都只能摸和，呢8場波就開咗6次細，可見o佢哋真係火力麻麻。




獨立隊就仲衰，開季兩戰輸晒一球未入過，搞到班Fans係咁向自己啲前鋒，好似法利亞斯幾個喝倒采，今場被迫搵18歲o靚仔馬田賓尼迪斯踢正前，咁嘅衰款想唔同學生隊鬥守「細」都唔得啦！