江山如畫着晒火

猪拉多纳

　　第六場三班1200米。「駿蹄飛」上賽前曾提及過，轉馬房首仗未必係熱身性質，只因啱分又路合，結果後上跑入第三名，跑得番證明轉倉後有實際效益。

　　跑完1場繼續做嘢，練者冇話因為驚隻馬會瘦，而喺工夫上就住，再睇埋馬重數字不減反加，絕對係好現象，睇嚟沈集成掌握到此馬操練竅門，由此推算，今仗狀態應更實淨。只要今場前中段唔係太慢，直路又早早望空，以佢嘅後勁，呢場冇邊匹對手可頂得住。

　　第七場三班1000米。「江山如畫」近5仗獲2冠1亞1季，係得泥地1場表現唔好，現階段可以話着晒火，上賽仲造出季內同程最快時間。當然，睇法有兩面，有機會高峰後回落，但計死數，今仗負磅比上場更輕，排4檔唔係特別差，預期賽事環境唔應該曳，爭勝條件仍然十足。若騎者把握到出閘，迅速上前自領，佢夠速度搶埋欄放，或可又再帶返。

馬會賽馬節目主持　洪禮賢