鄭俊偉第二鋪愛歡笑

猪拉多纳

鄭俊偉處理質新馬嘅手法不嬲都比較急進，近期亦頻頻靠呢類馬數胡，繼早排嘅「龜兔競跑」同埋喺龍年賀歲戰嗰隻「好勝煌」後，尋日年初七人日賽事，又靠另一隻質新馬「愛歡笑」增添進帳。值得一提，呢三隻馬都係喺香港嘅第二鋪贏馬，日後不妨吼實鄭廐第二次上陣嘅質新馬。
  
愛歡笑外欄一衝過晒。


扳上千六都得


其實「愛歡笑」上次初出已經喺田草千二米後上跑第六，今鋪換番嫡系殺手柏寶，即刻順利補中，賽後鄭俊偉就話呢隻馬上次如果唔係慢閘，應該會跑得更好。不過，呢隻四歲馬跑完一鋪，晨課明顯比之前進步咗，加上今組四班千二米嘅對手又唔強，卒之就把握機會勝出呢場賽事。鄭俊偉仲話之後點部署就要睇番「愛歡笑」跑完返嚟嘅進度，但長遠佢就覺得呢隻可以扳上千六途程。