撐巴塞「加」肥屋潤

猪拉多纳

22/01/2012
文： 鄭少偉

今晚係年廿九，聽日就係龍年大年初一，「亨利」喺度先同大家拜個早年，祝各位《太陽波經》嘅讀者買波戰無不勝、攻無不克，專同莊家過唔去，個個正、橫財就手，盆滿缽滿，恭喜恭喜！




除夕夜「亨利」同屋企人食完飯，就會約埋晨曦一班隊友去維園趁墟，行個大運，行開嗰頭嘅朋友，如果見到我哋，不妨過嚟打聲招呼，等我儲爆人氣過新年喎！行完花市，跟手梗係直落睇埋今晚幾場大戰，其中由「西甲曼城」馬拉加主場迎戰「地上最強」巴塞隆拿，戲碼之強，唔睇點對得住自己先？


馬拉加名大於實


講番巴塞喺上周中場西班牙盃首回合，作客對死敵皇馬嘅國家打吡，喺落後下又一次畀佢哋後上反勝，真係唔到皇馬教練莫連奴唔服！不過「亨利」最欣賞始終係巴塞班球員嘅比賽態度，成場波雖有唔少火爆場面，特別係個癲佬比比周圍辣火頭，壞事做盡，踩落美斯隻手度，我睇到眼都凸埋，但球王即係球王，美斯起番身無還手、無報復唔在講，仲保持冷靜去踢波，球王同球員嘅分別就係呢度囉！




美斯同一班巴塞隊友都好明白，最好嘅報復行動就係贏波，以德服眾，家陣全世界圍插比比同莫連奴，仲唔係乜仇都報晒咩？贏完一場咁大快人心嘅大戰，巴塞士氣正盛，加上早兩日牛一嘅教練哥迪奧拿，下個月就會續約1年，今日就算作客馬拉加，應該可以食住個勢再贏一場。雖然馬拉加季前喪買球星，未有成績就先有一個雅號「西甲曼城」，踢落亦都算ok，但對住巴塞，就算佔主場之利又點？無運行啦！一於博巴塞大炒馬拉加！（now632台周一凌晨1:00直播）