國米歎魚生粥迎新歲

猪拉多纳

22/01/2012


年廿九晚，除咗英超有連場大戰，意甲亦都有重量級比賽！國米今晚喺意甲主場迎戰拉素，雖然4哥拉素暫時排名較高，不過睇番近3季兩軍7次對賽，國米贏足5次，加上「藍黑兵」走勢凌厲，面對防守硬淨嘅拉素仍有力小勝，冷敲3.4倍讓球和，博國米小勝迎新歲。（now633及660台周一凌晨3:45直播）




國際米蘭 Vs 拉素




季初當國米頹到要護級嗰陣，又有邊個諗到佢哋依家有力爭奪歐聯席位？佢哋近7場全部贏晒，當中更試過大炒萊切及帕爾馬，連迪亞高米列圖同柏仙尼都突然復甦，班波嘅信心明顯返晒嚟，主帥雲尼亞里更道出箇中秘密：「關鍵其實在於球員，只要佢哋有爭勝決心，一切都會容易好多！」


藍黑軍主場對賽贏到慣


事實上，聖西路球場不嬲都係拉素墳墓，唔講AC，齋計「藍黑兵團」，客軍拉素近6次造訪國米，竟然輸足5場，當中僅得1次成功賽和對手，家陣又撞啱國米回勇，睇怕都好難破到「聖西路魔咒」。




拉素洛基缺陣焗住守




最重要嘅係，拉素今仗有前鋒洛基缺陣，首席射手高路斯近排嘅發揮亦唔多理想，近6仗先得1個入波，斟本田圭佑又喎咗。好彩，呢班波嘅防守尚算硬淨，近6仗作客有4戰冇失球，而且兩軍最近2次喺聖西路交手，國米都係僅贏一粒，有條咁靚嘅黃金好路，實在唔怕追多鋪！