狼隊迎維拉大有睇頭

猪拉多纳

21/01/2012
文： 翁文成

主隊連續9場未贏過，客軍近6場聯賽就有5場失分，狼隊同阿士東維拉今晚喺英超碰頭，睇落真係冇乜高低，之不過呢場波其實有路捉，事關狼隊對上8場英超主場已經連開8口大，今鋪入球大有成2倍，信路梗係要捧場啦！（有線202及302周六晚11:00直播）




狼隊家陣喺降班邊緣徘徊，若果唔係前鋒史提芬費查着晒火，近期頻頻入波搶分，睇怕已經拍住韋根齊齊包艇。狼隊啱啱喺足總盃畀英冠仔伯明翰踢出局，今晚為脫離降班漩渦又好，為向球迷交代都好，點都要踢得進取啲博3分。


維拉靠羅比堅尼數胡


對家維拉近況唔好得去邊，領隊麥利殊為解決鋒力薄弱問題，最近問銀河借咗羅比堅尼返嚟幫手，不過佢老人家賽前就扮有料，話唔一定畀羅比堅尼打正選喎，實情維拉21輪聯賽過後入得23球，唔靠羅比堅尼救亡聽乞食都似！




「球壇浪子」羅比堅尼今晚倒戈相向，對住今季聯賽只得1場保住清白身嘅母會大有機會數胡，狼隊亦有弗爆射手史提芬費查壓陣，睇埋狼隊連續喺英超主場開咗8口大，相信入波唔會少。


狼隊英超主場連開8口大


日期 戰果




12/01/02 1:2負車路士

11/12/21 2:2和諾域治

11/12/17 1:2負史篤城

11/12/05 2:1勝新特蘭

日期 戰果

11/11/06 3:1勝韋　　根

11/10/22 2:2和史雲斯

11/10/01 1:2負紐卡素

11/09/17 0:3負昆士柏流浪