利雲特莫財要拋售主力 博華倫大炒搵到食

猪拉多纳

19/01/2012
文： 朱楓

今晚西班牙盃8強首回合爆發華倫西亞區打吡，由華倫西亞先喺主場對利雲特。華倫日前喺西甲主場倒灶輸波，賽後一班球員畀教練艾美利省到「立立令」，呢場唔搏唔掂，對住財困準備拋售主力嘅利雲特，開2.08倍「讓球主勝」應該唔難！（開賽時間：周五凌晨4:30）




目前西甲「三哥」華倫西亞，踏入2012年戰績一般，上圈兩回合計僅憑作客入球優惠淘汰西維爾晉級，日前更喺西甲主場不敵下游球隊皇家蘇斯達，賽後教練艾美利怒插球員表現不知所謂，相信班球員知恥近乎勇，今晚表現應該會有改善。




對家利雲特暫時喺西甲仲排第4，領先第5位嘅畢爾包成4分，下季極大機會出席歐洲賽，不過佢哋賽前竟然宣布後防主力維多利亞諾蘭奴，將於今個月尾轉投中超球隊貴州人和，據聞轉會費只得50萬歐元（約496萬港元），嚟緊仲可能再拋售主力套現，士氣唔慌好得去邊。再睇埋佢哋近6次作客華倫都未贏過，今晚想破宿命唔易！