雄心有料做殺手

猪拉多纳

18/01/2012
文： 樂比堅尼

今日下午有兩場澳職，樂比仔較睇好墨爾本雄心。自布里斯班獅吼不敗紀錄被打破後，中岸水手成為澳職最炙手可熱嘅球隊，佢哋已保持十三場不敗，對上一次輸波已經係近三個月前，不過墨爾本雄心話晒係三甲球隊，水手作客讓平半似乎過分咗，建議捧下盤。




（周三下午4時30分開賽）




雄心早前創下五連勝佳績，所贏對手更係獅吼、勝利、ＦＣ悉尼等強隊，絕對冇水分，雖然最近成績略為回落，不過樂比仔覺得雄心班球員堅有heart，往往有遇強愈強嘅表現，所以今場對「一哥」水手，雄心有條件搶分成功。




事實上，雄心最大優勢就係攻力充足，今季僅得一場冇波入，中場嘅杜簡錫、麥湯遜助攻能力相當強，配合前線嘅高佬伊利巴巴積同埋巴西前鋒阿歷士泰拿，一剛一柔進攻彈藥唔成問題。


水手放走麥西蒙火力減


中岸水手今季表現穩定，但佢哋將首席射手麥西蒙放走，影響可謂非常大，冇咗佢之後，水手嘅入球能力削弱，近兩仗都係各入得一球，今場作客雄心隨時畀對手偷到雞！