巴塞暢遊皇馬樂園

猪拉多纳

18/01/2012
文： 法比加輝

今晚西班牙盃八強上演國家打吡戰，皇家馬德里首回合主場迎戰巴塞隆拿。同上月聯賽首循環一樣，加輝照舊睇好巴塞，原因都係嗰句，唔夠踢就係唔夠踢，巴塞自從由哥迪奧拿掌帥後，未曾在法定時間內輸畀皇馬，事實早已證明「地上最強」實力凌駕在「艦隊」之上，巴塞難得受讓，加輝強捧「讓球客勝」，進取者可博埋巴塞平手盤。（now 632周四清晨5時直播）


往績恰死皇馬


雖則話足球係圓嘅，但皇馬近年無論點樣變法，狀態點樣好，始終都及唔上巴塞。「地上最強」在○八年由哥迪奧拿掌帥後，四季內合共十二次國家打吡戰，未曾在法定時間內輸過畀皇馬，單憑呢個數據已值得投巴塞信任一票。更何況每次對賽都係巴塞佔上風，當中包括上月皇馬擁主場之利兼挾十五連勝強勢之下，咪又一樣被巴塞技術性擊倒。




由於皇馬現時在聯賽領先巴塞五分，教練莫連奴已多次重申，今季頭號目標係重奪西甲冠軍，其他盃賽都唔會緊要得過聯賽，因此「艦隊」對今場打吡重視性，好可能仲低過下場鬥畢爾包。


比比缺陣關鍵


再者計陣容及狀態，皇馬亦及唔上上月對賽時，事關「助攻王」迪馬利亞、比比及基迪拉均養傷，當中比比缺陣最為關鍵，後衞艾比路亞亦停賽，而靈魂人物C朗拿度在歇冬後明顯跌Watt，近四戰只入得一球。




反觀冧莊再奪FIFA金球獎嘅美斯則人逢喜事精神爽，上場梅開二度助巴塞四比二擊敗貝迪斯，以美斯現時勇態，皇馬陣中冇人嘜得住佢，已經保持十一場不敗嘅巴塞受讓要捧。