昆士柏流浪有新帥效應

猪拉多纳

15/01/2012


除咗亨利，今晚有另一名將再現英超，頭場紐卡素主場對昆士柏流浪，焦點係新官上任嘅昆士柏流浪領隊曉士。一個領隊對一支球隊幾緊要？淨係睇新特蘭換咗奧尼爾後脫胎換骨就知！曉士之前執教中型班富咸、布力般都相當成功，新帥效應加上紐卡素陣容不整，樂比仔捧「讓球客勝」！




（有線200及300台周日晚9時30分直播）




昆士柏流浪季初成績令人失望，係三支升班馬成績最差一隊，領導層終於忍無可忍，炒咗領隊禾諾克，新上任嘅曉士經驗豐富，曾執教布力般流浪、曼城同埋富咸，而且佢執教期間三支球隊表現都唔錯，以昆士柏流浪人腳，樂比仔相信佢哋喺曉士帶領下，下半季成績會有所提升！




事實上，昆士柏流浪喺呢段時間鬥紐卡素可以話再好不過，因為紐卡素首席射手丹巴巴亞已離隊備戰非洲國家盃，呢位塞內加爾射手今季表現神勇，射入十五球及貢獻四次助攻，紐卡素冇咗佢攻力肯定大減，最慘係另一名極為重要球員迪奧迪今仗亦要缺陣，紐卡素冇咗呢兩位球員，戰鬥力大幅減弱。


喜鵲回落缺射手


其實「喜鵲」紐卡素經過季初一段蜜月期後，近期表現已回落，近九場聯賽僅兩勝兩和五負，當中包括主場和另一支升班馬史雲斯○比○，可見佢哋攻力唔係咁強，今場仲要冇咗丹巴巴亞，新帥上任士氣如虹嘅昆士柏流浪有力反客為主！