|
|
14/01/2012
文： 江忠德
喺足球場上乜嘢事都有可能發生，曼聯連輸兩場英超失咗6球極頹，又能夠極速反彈喺足總盃淘汰曼城，姑勿論係咪球證幫手，點都要再一次高度表揚費格遜，相信佢今晚冇咁易放生保頓！
費爵爺帶咗「紅魔鬼」25年咁耐，有乜嘢大風大浪未見過？難怪佢對曼城之前夠膽同大家講——淡定有錢剩！佢老人家揸大旗一向夠硬淨，以心狠手辣見稱整頓紀律，肅清更衣室內不良風氣，唔理邊個都冇情講。
絕唔會再放生保頓
史高斯復出嘅作用主要係提升士氣，更深層意義係朗尼畀費Sir治到貼貼服服，咪以為自己係天王巨星就可以任意妄為！只要朗尼醒番交足貨，成條曼聯鋒線就生猛晒，要喺自己地頭入波話咁易。
雖然費格遜年紀唔細，近兩季少咗企喺場邊嘈喧巴閉，但內在鬥心依然好似一個後生仔咁，依家又見番佢同旁證發牢騷，到緊張關頭成塊面通紅，呢種霸氣令到球員好自然識得自動自覺去搏甩髀，保頓條防線危危乎！
|
|
金睛卡
发表于 2012-1-14 10:37
变色卡
显身卡