馬主論戰

猪拉多纳

        龜兔競跑賽績堅
        
        今日多位騎師停賽，形勢都幾混亂，最好係小注怡情。推介第二場「龜兔競跑」，上場初出跑直路賽，只係輸畀「名舵主」半個馬位跑第二，後駒再出之後亦再贏馬，證明賽事水準好高，今次再跑同程可補中。
        
        另外鍾意第七場「大家勝利」，以往兩場頭馬都響田草1200米取得，擺明路有專長，近幾仗跑其他路程，輸咗唔使介懷，今次回師強項路程，應該可見真章。
        
        張敬山
        
        金鑽龍華匆出掂
        
        剛啱都爾憑「上海先鋒」同「幸運紀錄」起孖，搏殺手風好順，今次不妨繼續吼實佢啲坐騎。推介第二場「勁啲啲」，上場響直路賽快放入Q，四歲馬以此程威力最強，今次再跑同程，睇嚟有決心贏番一仗，一於捧場。
        
        另外鍾意第八場「金鑽龍華」，表面睇呢隻馬評分好似盡盡哋，但上場話晒跑贏「名舵主」，響三班其實分量十足，隔一個星期匆匆再出，擺明想打鐵趁熱。
        
        任達華
        
        好食德謀交代
        
        蔡約翰同白德民呢對組合都算犀利，剛戰兩人又攜手起孖，試問點可以唔吼實佢哋啲馬？鍾意第五場「好食德」，今季跑咗五場，最叻都係得第二，表現當然唔收貨，今次加眼罩兼搵白德民操刀，有心謀交代。
        
        另外推介第七場「閃耀之星」，呢隻馬今季跑嚟跑去都贏唔到，主要係由於衝程較短，係一匹幾考騎功嘅馬，今次搵白德民嚟騎，可算係深慶得人，出頭在望。
        
        寇鴻萍、梁廷鏘