奧尼爾有料到 新特蘭斬草除「根」

猪拉多纳

03/01/2012
文： 安高

正所謂寧買當頭起，新特蘭搵到新帥奧尼爾領軍之後，近5戰取得3勝1和1負佳績，啱啱仲要砌低埋班霸曼城，氣勢好到冇朋友，今晚佢哋喺英超快車出訪弱旅韋根，平手盤安高認為捧「黑貓」客勝相當穩陣。（有線204及304周三凌晨3:45直播）

前線新星域咸傷愈

前維拉主帥奧尼爾自上月上旬接掌「黑貓」之後，除咗話近5戰攞到10分外，就連防守都大有改善，唔計對愛華頓嘅12碼失波，原來已經有成200分鐘保持不失。防線出色，前線演出亦逐漸穩定，池東沅同賓特拿都開始有貨交，前者更於上仗對曼城射入奠勝球，至於新星域咸又及時傷愈，今鋪絕對做得到坐和望贏。

韋根中堅卡達維停賽

對家韋根雖然話連續4場不勝，但其實當中包括踢和車仔同紅軍，狀態唔算太曳。可惜係佢哋今仗有防線重心隊長卡達維停賽，後防隨時立立亂，近期頻頻被委以重任嘅射手森蒙，竟然開季至今都未開齋，根本就唔夠資格踢英超。仲有一點，韋根今季喺主場9戰只得1勝4和4負，主場威力冇乜，小心畀「黑貓」咬死！