車仔前線搵緊超級救星

猪拉多纳

31/12/2011
文： 江忠德

人活喺幻想中好閉翳，車路士連和3場後，難得領隊保亞斯敢於面對現實，承認爭逐英超冠軍幾近絕望。事實上，「藍戰士」喺聖誕新年快車檔期，前線缺乏爆炸力，即使喺主場要大炒維拉都有難度，仲要防後面失波添。




「藍戰士」入波瓣數少，喜愛進攻嘅保亞斯自執掌以嚟一直着手調整戰術，基本上都係離唔開地面攻勢，尤其係有埋桑馬達之後，仲要求細膩嘅走位配合，弊在始終搵唔到破密集防守嘅良方，又冇超級球星可以一錘定音打救，難怪傳佢哋近排吼住波圖個侯克。


旨意「費托」唔實際


最慘係保亞斯嚟緊仲要為幾位非洲兵1月走去踢非國盃做準備，上仗對富咸就再次畀費蘭度托利斯擔大旗，結果又係冇驚喜，畢竟佢坐冷板太耐，心中團火熄晒，搵唔番入波觸覺，家陣需要更長時間恢復作戰狀態，保亞斯旨意佢食胡始終唔實際！




反觀麥利殊執教維拉後承受好大壓力，成班波由上到下變化咁大，點可能霎時間掂晒，所以麥利殊一直以穩為先，特別係作客絕對唔會輕舉妄動，所以9次作客和咗6場，唔贏冇所謂，最緊要保住1分，呢場又係照辦煮碗，個個做大丈夫守住腹地，睇怕「藍戰士」都幾頭痛！