烏拉圭上盤抵玩

港陌

02/07/2010

恃住體力化足球喺分組賽突圍，再喺16強擊敗美國嘅加納，為咗有多啲娛樂特登搬去間有賭場嘅酒店住，球員玩到心都創晒，今日8強遇上攻守瓣瓣有嘅烏拉圭，相信係時候講拜拜。烏拉圭憑穩固防守，配合弗到震嘅科蘭同蘇亞雷斯，讓平半有望贏波贏盤。（有線61及64、中央1及5台周六凌晨2:30直播）


嚟到8強階段，即係離決賽嘅距離又近啲，要晉級就愈講求真功夫。喺分組賽，加納可以博1勝1和1負攞4分出線；16強嘅時候，佢哋可以守住實力麻麻嘅美國嚟踢，但都要踢到加時先分到勝負。但嚟到8強喇，加納又可以點呢？面對攻、守實力達二班頭、一班尾嘅烏拉圭，唔可以好似分組賽咁有輸波嘅空間，亦好難好似對美國咁守住嚟踢，齋靠反擊搵食。

保定傷愈阿休坐波監

加納最蝕底係佢哋嘅攻擊力極之疲弱，雖然奇雲保定啱啱傷愈，但狀態唔慌好得去邊，最慘嘅係好波之人阿休今場停賽，前線齋靠基恩一個死衝爛撞，試問又點可以挑戰到由盧根奴領導嘅烏拉圭防線呢？


再話多單料畀大家知，話說加納班大軍去南非之後轉過一次酒店，原因係最先住嗰間乜都冇太悶、地點又山旮旯。之後搬去約翰內斯堡著名旅遊景點－太陽城內嘅酒店住，班球員就Yeah晒喇！事關間酒店隔籬就係大型商場，想食乜、買乜都有；酒店入邊唔止有Bar、有餐廳，仲有賭場，特登揀間咁嘅酒店住，球員仲唔玩到心散咩？呢個亦係我決定唔捧加納嘅原因。


烏拉圭其中一個優勝之處，在於領隊泰巴尼斯好識盡用球員長處，冇話好似一啲領隊咁扮高深、排怪陣，喺度雕花。手上有科蘭同蘇亞雷斯兩件前鋒射手，進攻就交晒畀佢兩個，其餘9個除咗龍門之外，就由中場開始布防，就算加根奴、迪亞高佩雷斯都係好波之人，但都好少擅離職守亂助攻。

科蘭蘇亞雷斯勤力好波

好似16強贏南韓場波咁，烏拉圭喺閃電領先之後就守住嚟踢，畀人追和咩？咪即刻現真身，攻到南韓球員透唔過氣，科蘭同蘇亞雷斯兩件前鋒唔止波底好，仲要好力、勤走動，南韓防守咁有紀律都奈佢哋唔何，相信防守力不及南韓嘅加納，今場又會畀到兩人大把機會上演「科騷」。

非常論戰

拉積華斯（加納領隊）

「雖然我哋依家好疲累，烏拉圭又有好勁嘅前鋒，但如果天神肯企喺我哋嗰邊，我覺得世上冇嘢係唔可能做到。」

科蘭（烏拉圭前鋒）

「我哋一定會殺入4強，證明南美足球有幾勁，希望可以令南美球隊世盃席位由現時嘅4隊半增至5隊。」

睇非搵食

烏拉圭小勝格

能夠吸引到800幾萬早飛，烏拉圭對加納場波似乎比想像中更受人關注。從隔夜投注去睇，烏拉圭係比較受追捧，有近600萬買佢哋W，但係水位唔見得下壓力量好大，加納得120萬咁上下，不過有段時間畀人買到質低咗，今場波烏拉圭贏都會好大壓力，「讓球和」可以一博，始終抵博過烏拉圭1.7倍上盤。

孭非球星

蘇亞雷斯‧超強入球機器

呢位烏拉圭前鋒今季喺阿積士顯示極強入球能力，隨住上場對南韓梅開二度，身價再度飆升，當中一球世界波更盡顯功架同卡士，今場肯定係加納後防嘅心腹大患。

蒙達利‧卡卡戴維斯混合體

經常同加納足總不和，之前因為同領隊拉積華斯鬧交差啲被逐離隊，但隨住阿休停賽，呢場好大機會首次喺今屆世盃擔正。曾被譽為卡卡同戴維斯嘅混合體，遠射腳頭極重。

首球推介

巴西喺今屆決賽周贏咗3場，3次都係先開紀錄，首球當然要留意森巴兵啦！上仗啱啱開齋嘅羅賓奴，信心返晒嚟，加上佢腳法速度射術瓣瓣掂，首選值得留意。次選就揀助攻能手馬爾干，貪佢射門欲強嘛！

烏拉圭喺分組賽至今合共射入6球，鋒力明顯比加納優勝，而且入球集中喺兩位前鋒身上，玩首名入球極之好路，熱選可以揀實力同經驗兼備嘅科蘭。至於次選就梗係揀近況大勇、連續兩場有「士哥」嘅蘇亞雷斯。