「告魯夫，收聲啦！」

港陌

02/07/2010
文： 黃興桂

期待多日嘅世界盃八強大戰今晚正式舉行，球迷街頭巷尾都談論荷蘭對巴西嘅世紀大戰，但近日荷蘭名宿告魯夫不斷發表言論，炮轟荷蘭同巴西踢法保守沉悶，Peter不禁要講句：「告魯夫，收聲啦！」


荷蘭同巴西今屆踢咗四場，每場都有攻有守，表現對辦，但係荷蘭嘅「無冕球王」告魯夫卻有彈冇讚，發表言論話荷蘭有辱全能足球，又話巴西踢法唔似巴西。

放棄傳統踢法係進步

呢位已經過氣嘅球王仲係唔明，佢嘅時代已經過去咗，冇得返轉頭，足球幾十年來進步咗好多，戰術踢法不斷修補改良，仍然喺球圈謀生嘅人，為咗生存就要適應，亦要懂得喺唔同環境作戰。


巴西點會唔似巴西？右閘馬爾干對北韓嘅近乎零角度入球，就好有70年巴西名宿阿爾拔圖「腳外檔」抽射嘅影子，而今屆巴西踢法悅目得嚟又穩陣，唔使擔驚受怕，啱晒擁躉合尺。


至於荷蘭，八十年代南華嘅荷蘭外援夏文高向《東方》讀者來料，佢話荷蘭好大機會派出古積特同馬爾干鬥法，仲話荷蘭踢法表面上偏向穩重，但攻起上嚟都可以水銀瀉地，今場同巴西鬥智鬥力，準備鍊鋪勁。


足球比賽，梗係有攻有守先好睇，荷蘭對巴西絕對係一場互有攻守嘅大戰，對陣似捉棋，充滿球味，呢啲咪好波囉！

今日醒你

「荷蘭對巴西係早咗10日嘅冠軍戰！」雖然世界盃決賽仲有個幾星期至舉行，但喺Peter心目中，荷蘭同巴西係今屆最佳球隊，今場對決可以話係貨真價實嘅冠軍前哨戰，點可以錯過呀？

「金句王」黃興桂

重回香港評述

世界盃，戰術、技術、金球

同你句句金。