多倫多走細勁追多鋪

港陌

01/07/2010
文： 亨格比利

世盃8強戰禮拜五晚開打，不過聽朝就有場美職玩，由FC多倫多主場迎擊侯斯頓戴拿模。多倫多防線固若金湯，走勢唔錯，對住有前冇後嘅侯斯頓，讓平半可秤先，1.62倍入球細亦宜兼顧。（開賽時間：周五早上7:00）


季前得12位球員嘅多倫多，畀人睇死冇運行，點知班球員就大打爭氣波，最近6場聯賽保持不敗，當中只失1球咁大把，由艾達高拿基恩領軍嘅防線應記一功。此外，掃蕩力強嘅防中迪根斯文同次席射手查特巴列特已經傷愈，教練比基可以派強陣出擊。

侯斯頓近4場聯賽失11球

對家侯斯頓有王牌射手程拜仁冇份入選國家隊，偏偏佢哋近4場聯賽輸咗3場，4場波夾埋勁失11球，撞正多倫多球星迪羅沙里奧今季腳風咁順，侯斯頓條防線今鋪實有難。


翻查往績，侯斯頓對上3次造訪多倫多未贏過，何況多倫多今季主場出擊夠晒穩陣，6戰獲得4勝2和僅失2球嘅佳績，以侯斯頓嘅差劣近況根本冇本錢偷雞。考慮到多倫多鋒力唔算話好強，未致於有能力大炒對手，估計都係一球上落，除咗敲上盤之外可補多注入球細。