伊度亞度大勇施薩索拉斯都讚好

港陌

29/06/2010

葡萄牙正選門神伊度亞度表現神勇，雖然上年先為國家隊正式披甲，國際賽年資仲淺，但佢嘅能力絕對不容置疑，最厲害係佢至今為葡萄牙上陣18場只失過3球，難怪熱門巴西嘅龍門施薩索拉斯亦對佢讚不絕口！

唯一未失過波門將

伊度亞度大熟大勇，係今屆世盃唯一一個未失過波嘅門將，嚟緊即使要面對熱門西班牙，佢亦有信心咁話：「球隊有充足嘅準備去迎戰任何球隊，我亦希望幫助大家走得更遠。我哋每逢大賽都面對好多強勁對手，每次都會盡力去爭勝。」


同樣有鋼門之稱嘅施薩索拉斯，對於伊度亞度就識英雄重英雄咁話：「伊度亞度喺分組賽未失1球，身手非常好，有佢喺度對手好難入波，所以我哋最好喺決賽先再對葡萄牙。」