哥倫布機員大報復

港陌

29/06/2010
文： Mic少

明早有四場美聯盃第三圈賽事受注，全部由美職球隊對甲組球隊，當中以哥倫布機員主場對羅徹斯特犀牛最值得留意。犀牛係唯一曾打破美職球隊壟斷美聯盃冠軍嘅低組別球隊，踢盃賽有一手，而機員經過三星期休息後，上仗聯賽擊敗華盛頓聯隊，打破連續三場不勝悶局，狀態回勇，今仗應有一番激鬥，建議捧入球大。 （周三早上7時30分開賽）


自從美職九六年成立以來，近十四屆美聯盃有十三屆由美職球隊奪得冠軍，唯一例外係一九九九年，當時羅徹斯特犀牛喺決賽以二比○ 擊敗科羅拉多急流，締造歷史。呢支甲組仔上屆第三圈憑互射十二碼淘汰機員，最後打入四強。犀牛今屆又遇上機員，心理上唔會輸蝕。

機員反彈 射手回勇

另一邊廂，哥倫布機員現時位居東岸榜首，實力毋庸置疑，最重要係佢哋已經擺脫五月尾至六月頭嘅低潮期，上仗以二比○輕取華盛頓聯隊，名牌前鋒舒希洛圖終於重拾射門鞋，有一球進帳，相信球隊已重回正軌。而且機員上屆被犀牛淘汰，今仗當然要爭取報仇，勢必強攻對手。問題係機員防線唔算穩，投注首選入球大。


賽制方面，全部賽事以一場決勝負，如果法定時間九十分鐘內打和，會加時三十分鐘，再和則以互射十二碼定生死。