日本無懼巴拉圭

港陌

29/06/2010
文： 巨高

世盃十六強賽事，南美球隊巴拉圭鬥日本。基於南韓已被烏拉圭淘汰，日本已成為決賽周唯一存活嘅亞洲球隊，適逢日韓兩國領袖喺G20峰會聚首，南韓總統李明博亦祝福「東洋兵」成功過關，今場日本肩負兩國國民期望，球員將發揮「瞓身報國」精神，加埋射自由球絕技，撲擊欠缺霸氣嘅巴拉圭，巨高揀日本「讓球客勝」！ （有線61台周二晚10時直播）

南韓總統祝福東瀛

繼美國總統奧巴馬同人「賭啤酒」，正於加拿大進行G20峰會嘅領袖，再次以世盃為話題，期間南韓總統李明博亦特登搵嚟日本首相菅直人，表示希望日本可以為亞洲隊出番口氣，祝福佢哋擊敗巴拉圭。連民族意識強烈嘅南韓亦送上激勵，勢必令日本國腳鬥志更強。


事實上，日本之前喺熱身賽表現差劣，領隊岡田武史更盛傳會離隊，正當日本出現大危機之際，球員竟大打爭氣波，先後擊敗喀麥隆及丹麥繼而取得十六強資格。


日本球員可於短時間內將狀態升至頂點，全因佢哋有無限鬥志支持，今次賽前仲得到南韓總統李明博祝福，「東洋兵」嘅精神力量必定進一步提升。岡田武史早前所定立嘅四強目標，目前睇並非遙不可及。


另外日本仲有射自由球呢個強力武器，佢哋一早用科學角度將「普天同慶」分析，得出數據後再交國家反覆練習，所以對丹麥嘅比賽，本田圭佑同遠藤保仁先可以憑靚絕罰球取勝。

巴拉圭冇乜霸氣

反觀對手巴拉圭，佢哋喺三場分組賽只踢過一場好波，就係以二比○擊敗斯洛伐克，其餘兩場都欠缺說服力，尤其對住活力、信心不足嘅意大利都贏唔到，實在令人失望。其實喺呢類大賽好講求氣勢，因此巨高深信從谷底反彈嘅日本可一鼓作氣擒下巴拉圭，日本受讓下揀「讓球客勝」就最啱數。