賠率有路捉：奔騰飛駒有玄機

魑魅魍魉

　　尾場早飛「帝豪龍駒」係大熱門，不過都有成49蚊，「威武雄星」、「寶成智星」同「重量級」都係七倍左右馬，可想而知呢場好混亂。但係有隻馬卻突然有飛，講緊係「奔騰飛駒」，在港十戰仗仗大冷門之餘，連一場P都冇，前仗仲跑到心律不正，上仗復出都係冇走勢，好難估計到噚日四點只係得88蚊W，P亦有支持，仲係26蚊第三熱門，好明顯有人WP齊落，相信今晚一定有料到。

頭盤位置1.1倍

　    賠率古怪仲有第六場「頭盤」，呢隻大摩馬房團體馬名氣夠晒大，但在港十二戰又係連P都冇，情況同「奔騰飛駒」差唔多，今次仲係換上同馬房冇交收嘅賴維銘上陣，真係估唔到只得六倍W，位置仲要係1.1。睇番騎練近三季合作五次例唔上名，今季合作一隻「高鳴」仲要輸一條街，真係唔知何方神聖咁有把握，既然隔晚WP都咁硬淨，唔通今晚真係交出好表現﹖

韋達熱唔透

    　騎師王方面，冇柏寶嘅日子，韋達又騎足八場，居然有超過廿蚊，似乎有啲暗湧。蔡明紹同潘頓勝在出馬多，但實力唔係太過強。既然今晚鍾意「奔騰飛駒」，加上卓利仲有「大東海」同「士多啤梨」兩匹實力馬，而且「常山鳳寶」排檔亦唔差，有權偷吓雞，不妨小注有成三十幾倍嘅卓利喇　。

周仲