馮諾嘉手記：停賽損失大 柏寶優勢頓減

魑魅魍魉

　　嚟緊禮拜三谷草休戰，要去到禮拜日才跑谷草日馬，但係大家唔會悶，唔使等到禮拜四至有周日賽事排位表，皆因周三會先有澳港盃嘅排位，大家就可以刨下嚟緊禮拜六嘅澳港盃，馬會將越洋轉播澳港盃賽馬日，並接受投注，大家當然要支持吓港隊喇﹗

　　香港原本有五匹代表，但「黃鑽石」退出後，就只有「創佳績」、「羅馬」、「活力飛駒」同「尚兄」，而澳門代表中，評分最高嘅係「金手槍」，不過佢上次係港澳盃表現認真麻麻，跑尾二輸成九個馬位，似乎又唔係想像之中咁犀利，睇吓今次返主場跑會否大變身，至於上次神勇爆99倍勇奪港澳盃嘅「爆料」，今次澳港盃並無上陣，馬主何鴻燊只派出「爆燈」角逐，但係講到最尾澳門賽事檔位好重要，抽外檔嘅馬隨時蝕唔起，所以都係留番禮拜三出咗排位之後，再聽埋各練馬師嘅分折，才再下定論。

　　睇番騎師龍虎榜嘅形勢，柏寶季初曾經一度帶離韋達超過十場，加上當時韋達手風不濟，眼見柏寶帶出小妹都相當開心，皆因今季嘅冠軍騎師終於有機會打破以往由韋達獨攬嘅悶局，而且柏寶多番奪得最受歡迎騎師，證明粉絲唔少，相信支持者都希望佢可首奪冠軍騎師嘅寶座，可惜韋達一再迫近，上個賽日更乘柏寶停賽連中三元，而柏寶原本策騎上陣嘅「相見歡」同「時時攞彩」，卻易配即鸁，未能拋離韋達之餘，仲畀韋達追到氣咳，依家兩者頭馬數字相當接近，只差三場，適逢兩大騎師都會停賽，柏寶仲要停賽多兩日，相信韋達一定會趁機再追近啲，甚至過頭，因為韋達之後要停賽四日，到時又輪到柏寶發威，誓要力保首嚐冠軍騎師嘅機會，騎師榜嘅形勢緊湊成咁，兩大騎師一定會力拼到底，估計有可能要鬥到季尾最後一戰，先至分得出高下，到時真係好睇過戲，大家要拭目以待。