北愛鋒力弱入波唔慌多

猪拉多纳

今晚國際賽一眾強隊統統休息，波友亦不妨抖抖為聽日連場大戰儲定彈藥先。若然想過吓手癮，不妨考慮北愛爾蘭主場鬥斯洛文尼亞，雙方同樣唔係以攻力見稱，1.53倍入球細可以一試。

（TVB302周二凌晨2:45直播）

北愛爾蘭喺今屆歐國盃外圍賽予人驚喜，喺F組力壓羅馬尼亞、匈牙利以首名出線，最近亦錄得連續9仗不敗成績，狀態的確唔錯，不過呢班波嘅火力始終嫌弱不宜高估。佢哋近3仗鬥威爾斯、拉脫維亞同芬蘭，合共入得3粒。加上國家隊首席射手拉菲迪，就連踢英超護級球隊諾域治都唔夠班，早前被球隊送咗去英冠球隊伯明翰，對佢嘅信心不無打擊。
斯洛文尼亞隨時hea踢

至於對手斯洛文尼亞，就喺歐國盃附加賽中被烏克蘭淘汰出局，成班球員唔使特別搏表現，今仗戰意成疑，隨時hea踢都唔奇。睇番佢哋5場比賽入面，對住馬其頓、聖馬力諾同立陶宛呢班歐洲知名魚腩球隊，夾埋都只係入得5球，就知班波嘅火力屬有限公司。難怪雙方自08年交手以嚟，連續4次對碰從未出現過多過2個入球，並唔係冇原因囉。