巴塞爆廠無限Loop

猪拉多纳

阿仙奴作客翻盤？天方夜譚！

今晚歐聯16強次回合，阿仙奴作客衞冕嘅巴塞隆拿，想收復首回合主場落後兩球嘅失地，無論以數據、往績同實力嚟計，都可以話係天方夜譚。首先數據話畀大家知，喺歐聯首回合主場落後兩球嘅球隊翻盤機會率低於10%，更何況兵工廠3日前至喺足總盃出局，士氣跌落谷底。今仗焗攻但隨時會畀巴塞「MSN」嘅反擊打爆，睇埋佢哋近兩次造訪魯營都輸兩球或以上，睇怕今仗又係「舊片重播無限Loop」，斯維捧巴塞讓球主勝。

（有線61及201台周四凌晨3時45分直播）
A山比利連 倒戈冇運行

今仗係阿歷斯山齊士（A山）同比利連自離開巴塞後，首度重返魯營球場倒戈，真係百般滋味在心頭，點都想踢番場爭氣波，查實首回合喺主場對「地上最強」兩人都好搏命。不過A山自傷愈後始終返唔番巔峰狀態，成日扭波斷纜，比利連則經常掛住助攻回防唔切，卒之被美斯起孖，輸0比2陷於被動，而且巴塞成日放風話要回購呢位右閘，或多或少都會影響其作戰心情。

此外，阿仙奴連盃賽在內近7仗贏得1仗咁大把，狀態曳爆，周日晚足總盃8強對屈福特，喺基奧特、奧斯爾、A山等主力悉數上陣都要輸1比2，3連冠夢碎兼士氣重挫，何況門將施治、中場艾朗藍斯、阿歷士張伯倫今仗肯定倦勤，守將哥斯尼亦上陣作疑，最弊係依家落後兩球，想晉級就需要3比0或者3比1嘅比數，或起碼贏2比0博加時，大前提係點都要攻，但谷得太上，話轉身遲鈍嘅梅迪薩卡同甩漏多嘅基比爾包列斯達可以頂得住美斯、蘇亞雷斯及尼馬嘅反擊，雲格自己唔信啦！
阿蘇抖足 贏兩粒冇難度

各項賽事累計37場不敗嘅巴塞今仗雖有中堅碧基坐波監，但揸住兩球喺手真係未驚過，一於等阿仙奴嚟攻先至插多佢幾刀，主帥安歷基上仗對基達菲特登收起蘇亞雷斯，畀阿蘇抖夠爆「廠」。如果巴塞今仗贏波，將締造球隊史上首次歐聯主場10連勝嘅新紀錄，而之前9連勝中有6次至少贏兩粒，可見邊隊嚟到魯營都腳軟。

翻查紀錄，原來阿仙奴之前兩次於淘汰賽遇巴塞均出局，當中兩次到訪魯營都輸2球或以上，今仗翻盤固然渺茫，就算想唔大敗都有難度，讓球主勝咪錯過。