羅馬乘勝追薩

猪拉多纳

小法老及時雨激活首都軍

意甲周中加開快車，薩斯索羅主場對羅馬打頭陣，羅馬換帥簽新兵之後，終於見成效，新加盟嘅前鋒艾沙拉維上仗射入1球靚波，協助球隊以3比1擊敗費辛隆尼，亦係新教練史巴列堤領軍3仗以來首次贏波，總算有起色。羅馬人腳質素佳，依家打番起信心，勝仗應該陸續有來，一於再追，捧客勝

（TVB301周三凌晨3時45分直播）

羅馬上仗結束4仗不勝頹勢，「小法老」艾沙拉維表現亮眼，包括以1記後腳入波，技驚四座。呢位意大利新星以往效力AC米蘭亦不時入世界波，加上創造力強，可為羅馬注入生氣，加上托迪已復出，以及迪斯高、穆罕默德沙拿、比真歷等猛將，羅馬中前場人腳濟濟，只要發揮出水準，要贏薩斯索羅並唔難。薩斯索羅已連續4場未贏過，即使近5次主場都不勝，跌入低潮。佢哋升上意甲後，兩次主場對羅馬，都輸波共吞5蛋，睇怕今仗凶多吉少。
摩納哥殘陣捱「細」界

法甲亦開快車，摩納哥主場對巴斯蒂亞，老二摩納哥剛作客吞昂熱3蛋，士氣大受打擊，加上中場杜拿蘭、湯馬士林馬、艾達馬查奧爾、前鋒艾雲卡華利路、後衞托尼等多位球員養傷，殘陣出擊難以喺巴斯蒂亞身上佔到甜頭，寧願揀入球細。

（TVB302周三凌晨2時直播）

另一場法甲蒙彼利埃主場對馬賽，馬賽已連續兩場聯賽失分，最大鑊係首席射手巴舒亞伊今仗停賽，更加咬唔入對手，平手盤揀主隊蒙彼利埃。

（TVB302周三凌晨4時直播）