人滿為患副選爭位 車仔餓兵追殺病狼
英格蘭足總盃16強焦點之戰，英冠狼隊主場鬥英超一哥車路士！狼隊上兩圈淘汰兩支英超球隊史篤城及利物浦，盡顯英足盃「爆冷溫床」傳統，不過狼隊之後表現每況愈下已3連敗，想再過一關相當困難。車路士領隊干地今仗或會收起部分主力，但巴舒亞伊、法比加斯、尼敦阿基等副選本身質素高，而且為爭上位，更加會把握機會落力演出，足以輕取狼隊，捧讓球客勝。（LeSports HK應用程式周日凌晨1時30分直播）
狼隊英冠3連敗陷低潮
狼隊連續兩圈越級挑戰成功，贏完史篤城再擊敗利物浦，但要留意當時呢兩支英超球隊正值低潮，其中紅軍輸畀狼隊之前，已先後不敵史雲斯及修咸頓，所以狼隊可以淘汰利物浦，主因係趁對手病，攞佢哋命，成績「水分」甚重。風水輪流轉，依家輪到狼隊陷入低潮，近3仗英冠全敗，其中兩場敗仗對手，只係護級分子伯頓同韋根，可想而知狼隊走勢有幾弱。其實就算以狼隊正常水平，都唔夠車仔鬥，更何況依家淪為「病狼」，等劏就有份。
車路士今場好大機會輪換陣容，但唔代表實力會弱好多，皆因陣中人腳本來已預埋應付歐聯，今季無緣歐洲賽，出現人滿之患。巴舒亞伊、法比加斯、尼敦阿基等副選都係獨當一面嘅猛將。特別係射手巴舒亞伊實力不在迪亞高哥斯達之下。日前有韋斯咸球迷寸巴舒亞伊上陣時間，仲少過已離隊嘅韋斯咸前鋒施蒙尼沙薩，呢位比利時國腳馬上霸氣回應，話自己入波多過施蒙尼沙薩。
巴舒亞伊盃賽有貨交
由於巴舒亞伊多數喺英超尾段上陣，聯賽根本冇時間表現，僅有1球進帳，情有可原。巴舒亞伊獲安排主要踢盃賽，往往交足功課，英聯盃對布里斯托流浪，個人梅開二度，上兩圈英足盃，巴舒亞伊都有波入，協助車路士大勝彼德堡4比1，贏賓福特4比0。如果計埋上屆作客5比1大炒米爾頓凱恩斯，贏斯肯索普2比0，車仔近4次英足盃對非英超球隊，都可以淨贏2球或以上，讓球客勝值博。
页:
[1]