紅魔爭霸殺聲震天
普巴打吡保羅贏級數歐霸盃32強首回合今晚展開，被視為奪標大熱嘅英超勁旅曼聯，將會主場迎戰法甲球隊聖伊天。呢場波最大焦點當然係「普巴兄弟」打吡戰，曼聯中場保羅普巴會對住效力客隊嘅哥哥費倫丁普巴，而今場波形勢就好似呢個兄弟嘅級數一樣，細佬保羅贏條街，曼聯可望輕鬆拔頭籌，就算讓二球照捧讓球主勝。
（Now 670及Fox Sports Play周五凌晨4時05分直播）
曼聯中場保羅普巴季前以世界最高身價轉會費加盟，初時都備受批評，但經過適應期後，近期表現漸入佳境，同時亦帶領「紅魔鬼」戰績不斷冒升，上仗聯賽2比0擊敗屈福特後，曼聯喺英超已經保持16仗不敗，加上曼聯今季主場出戰盃賽分外出色，計晒歐霸同國內兩項盃賽在內，曼聯今季8仗主場踢盃賽全勝，其中5仗贏對手3球或以上，包括2仗歐霸分組賽大炒費倫巴治及飛燕諾。
伊巴做慣聖伊天剋星
「紅魔」曼聯依家喺英超面臨激烈爭逐，歐霸賽事當然希望「快刀斬亂麻」，如果首回合喺奧脫福可以大勝一仗，領隊莫連奴次回合就可以大幅度輪換，今仗決心肯定充足。曼聯前鋒朗尼病愈可望披甲，加上安東尼馬迪爾亦有翻生之勢，王牌前鋒伊巴謙莫域以往踢法甲，13次對住聖伊天入14球，認真誇張！
聖伊天依家排聯賽第5位，不過近期作客成績麻麻，近4仗作客只係贏得1仗，而且聖伊天歷來對英格蘭球隊都冇乜好下場，6次對住「英兵」得1勝1和4負，其中3次作客去到英格蘭都輸晒，今仗造訪奧脫福球場都係凶多吉少。
页:
[1]